بەپێی زانیاریەكان، تاوەكو ئێستا 8 كەس لە پارێزگای سلێمانی بەهۆی سكچوون و رشانەوە كە گومان دەكرێت كۆلێرا بێت گیانیان لەدەستداوە، كە دوانیان منداڵن و 6یان پێگەیشتوون، بەهۆی پەتاكەشەوە شاندێكی تەندروستی عیراق هاتوونەتە سلێمانی.
لەو بارەیەوە سەرچاوەیەك لە بەڕێوەبەرایەتی گشتی تەندروستی سلێمانی بە میدیاكانی وت، تاوەكو ئێستا بەهۆی پەتای سكچوون و رشانەوەوە 8 كەس لە سلێمانی گیانیان لەدەستداوە.
بەپێی وتەی هەمان سەرچاوە، ئەو 8 كەسەی گیانیان لەدەستداوە 6 كەسیان پێگەیشتوون و دووانیان منداڵن.
ماوەیەكە پەتای سكچوون و رشانەوە لە پارێزگای سلێمانی بڵاوبووەتەوە و نزیكەی 4 هەزار كەس براونەتە نەخۆشخانەكان، تەندروستی سلێمانیش گومانی ئەوەی هەیە كە پەتاكە كۆلێرا بێت و پشكنینەكان نێردراونەتە بەغدا بۆ دڵنیابوونەوە و تاوەكو ئێستا نەگەڕاونەتەوە، هەر لەو بارەیەوە شاندێكی وەزارەتی تەندروستی عیراق هاتوونەتە سلێمانی بۆ هەڵسەنگاندنی بارودۆخەكە و رێوشوێنە پەیڕەوكراوەكان.
