راوێژكاری سەرۆكی حكومەتی هەرێمی كوردستان بۆ ناوچە كوردستانییەكانی دەرەوەی ئیدارەی هەرێم رایگەیاندوە، هەتا رەوشی كەركوك و ناوچەكانی دیكەی كوردستان ئاسایی نەكرێنەوە هەر سەرژمێرییەك بكرێت نادەستوری و نایاساییە.
بڕیارە حكومەتی عیراق پڕۆسەی سەرژمێریی دانیشتوان ئەنجام بدات لەسەر ئەو پرسەش رێبوار تاڵەبانی بە ماڵپەڕی فەرمی پارتی وتوە، تا ئێستا بڕیارەكە بە فەرمی رانەگەیانراوە، سەرژمێرییەكە دواكەوتوەو دەبو ساڵی 2007 ئەنجام بدرایە بۆ ئەوەش پاساوی ناجێگیری بارودۆخیان هێناوەتەوە، ساڵی 2017ش بەهەمان شێوە ئەنجام نەدرا.
رێبوار تاڵەبانی باسی لەو سەرژمێریانەش كردوە كە لەسەر دەمی رژێمی بەعسدا كراون بە سیاسی ناو دەبات و ئاماژەیكردوە، هەر كاتێك عیراق بارودۆخی سەقامگیر بوایە ئەو پڕۆسەیەی ئەنجام نەدەدا، بەڵكو كاتێك لەشەڕدا بوایە یان نائارام بوایە پرۆسەكەی ئەنجامدەدا، وەك ئەوەی لەساڵی 1987 و 1997دا ئەنجامیدا، ئەوەش لەپێناو شاردنەوەی رێژەی راستەقینەی كورد لەو ناوچانە بوە، بەداخەوە حكومەتەكانی دوای رژێمی بەعسیش هەمان سیاسەتیان گرتۆتەبەر، بەتایبەتیش لەمادەی 140 كە پەیوەندیدار نەبوو بە سەرژمێری گشتی، نوسراوی فەرمیم هەیە كە عەبادی خۆی داوای لێبوردن دەكات لەوەی ناتوانێ جێبەجێی بكات لەبەرئەوە سەرژمێری نەكراوە.