مەسعود بارزانی سەرۆكی پارتی دیموكراتی كوردستان دەڵێت، ئەگەر حكومەتی فیدراڵی لە ساڵی 2007ەوە جددی بووایە لە داڕشتنەوەی یاسای نەوت و غاز، كاتێكی زۆرمان بۆ دەگەڕایەوە و زۆربەی كێشەكانیش چارەسەر دەبوون.
مەسعود بارزانی لە چاوپێكەوتنێكدا لەگەڵ رۆژنامەی “الوفد”ی میسری سەبارەت بە مافەكانی كورد لە عیراقدا ئاماژەی بەوەداوە، سەركەوتوو بوون لە داڕشتنی دەستورێكی باش كە مافەكانی خەڵكی كوردستان زامن بكات، هەروەها مافی هەموو عیراقییەكانیش، بەڵام تاوەكو ئێستا جێبەجێ نەكراوە و لایەنەكان پێوەی پابەند نەبوون.
رونیشیكردووەتەوە، بەداخەوە دۆخی ئێستای عیراق سەختە و دووچاری قەیرانێكی قوڵ بووەتەوە بەهۆی ئەو ئاڵۆزیانەی دوای راگەیاندنی ئەنجامەكانی هەڵبژاردن دروستبووە، لە گفتوگۆ بەردەوامن بۆ چارەسەركردنی گرفتەكان.
سەبارەت بە كشانەوەی موقتەدا سەدر لە پرۆسەی سیاسی سەرۆكی پارتی وتویەتی، دوای كشانەوەی سەدر هەر پەیوەندی دۆستانەیان لەگەڵیدا هەیە كە لەسەر بنەمای هاوپەیمانی نییە، هاوپەیمانێتیمان لەگەڵ سەدر لەسەر بنەمای دوژمنایەتی لەگەڵ لایەنەكانی دیكە پێكنەهێناوە، بەڵكو پێیانوایە كە پێویستە هاوپەیمانێتییەكان لەسەر بنەما نەتەوەیی و نیشتمانییەكان بنیاد بنرێت.
مەسعود بارزانی سەبارەت بە یاسای نەوت و غاز و كێشەكانی نێوان هەرێم و بەغدا لەو بارەیەوە هێمای بۆ ئەوە كردووە، هێز هەیە كار بۆ ئەوە دەكەن یاساكە بەشێوەیەكی نیشتمانی و بە كۆكبوونی هەموو عیراقییەكان دانەڕێژرێتەوە، ئەمەش بووەتە هۆی ئاڵۆزتربوونی بابەتەكە لەنێوان هەردولا، پێویستە پەلە بكرێت لە دەركردنی یاسایەك بۆ ئەوەی پرسی وزە رێكبخات نەك تەنیا لەنێوان هەرێم و بەغدا بەڵكو لەنێوان هەموو پارێزگاكان كە بەرهەمی نەوتیان هەیە، ئەگەر حكومەتی فیدراڵی لە ساڵی 2007ەوە جددی بووایە لە داڕشتنەوەی یاسای نەوت و گاز، كاتێكی زۆرمان بۆ دەگەڕایەوە و زۆربەی كێشەكانیش چارەسەر دەبوون.
