دەزگای ناوەندی بۆ ستاندارد كردن و كۆنترۆڵكردنی جۆریی سەربە وەزارەتی پلاندانانی عیراق هۆشداری دەدات لەوەی، هەرێمی كوردستان پشكنین بۆ ئەو كاڵایانە ناكات كە هاوردە دەكرێن.
شاكر مەحمود عەبادی بەڕێوەبەری راگەیاندن و پەیوەندییە گشتییەكان لە دەزگاكە رایگەیاندووە، لەگەڵ هەرێمی كوردستاندا هیچ رێكەوتنێك نییە تایبەت بە پشكنینی كاڵاكان و هەرێم پابەند نابێت بە سیستمی نیشتمانی بۆ كۆنترۆڵ كردنی جۆری ئەو كاڵایانەی كە دێنە ناوەوە لە هەرێمەوە هەروەها ئەو كاڵایانە پشكنینیان بۆ ناكرێت.
رونیشیكردووەتەوە، لەگەڵ 4 كۆمپانیای بیانی گرێبەستیان كردووەبۆ ئەنجامدانی پشكنینی پێشوەخت كە ئیماراتی و بەریتانی و چینی و فەرەنسین، سەرەڕای ئەوەش لەلایەن دەزگای ناوەندی بۆ ستاندارد كردن و كۆنترۆڵكردنی جۆریی چاودێری چڕ دەكرێت.
هەرێمی كوردستان كە وڵاتێكی بەكارهێنەرە پشت بە وڵاتانی دەوروبەری دەبەستێت بۆ هاوردەكردنی كاڵا بەتایبەتی ئێران و توركیا، سەرەڕای ئەوەش كاڵایەكی زۆر بە رێگەی چاقاخ دەهێنرێنە ناوەوە كە مەترسی گەورەیان هەیە بەهۆی خراپی كواڵێتییانەوە.
