سەڵاحەدین بەهائەدین ئەمینداری گشتی یەكگرتوی ئیسلامی كوردستان رایگەیاند: سەركردەكانی كورد وانەو عیبرەتیان لە پەرتبون و ناتەبایی وەرنەگرتوە.
ئەم وتەیەی ئەمینداری گشتی یەكگرتوی ئیسلامی كوردستان لەمیانی كۆبونەوەیەكیدا هاتوە لەگەڵ ژمارەیەك لە ئەندامانی حزبەكەی و لە بەشێكیدا رایگەیاندوە، بەدرێژایی مێژوو هەوڵی دەرەكی و ناوخۆیی بۆ دورخستنەوەی ئیسلام لە كورد شكستیهێناوە، چونكە مێژوو ئەوەی سەلماندوە كە ئیسلام خزمەتی گەورەی بە سەرجەم گەل و نەتەوە جیاوازەكان كردوە، لەنێویشیاندا گەلی كورد كە پڕاوپڕە لە زاناو سەركردەی دیار كە پەروەردەكراوی ئیسلام بون و جیهانی ئیسلامیش شانازی پێوەكردون.
لەبەشێكی تری وتەكانیدا سەڵاحەدین بەهائەدین تیشكی خستۆتە سەر بارودۆخی عیراق و هەرێمی كوردستان و ئاماژەی بەوەداوە كە سەركردەكانی كورد دەرس و عیبرەتیان لە پەرتبون و ناتەبایی وەرنەگرتوە كە زۆربەی شكستی شۆڕش و خەباتی كورد بەهۆی ناتەبایی و خۆخۆری هاتۆتەئاراوە.
