نێچیرڤان بارزانی سەرۆكی هەرێمی كوردستان و سیناتۆری ئەمریكی لینزی گرام و ئالینا رۆمانۆوسكی باڵیۆزی ئەمریكا لە عیراق كۆبونەوە.
بەگوێرەی راگەیەنراوێك، لەو كۆبونەوەیەدا دوایین پێشهاتەكانی شەڕی دژی تیرۆرو پەیوەندییەكانی هەولێرو بەغداو چارەسەركردنی كێشەكانی نێوانیان تاوتوێكراوەو هەردوولا جەختیان لەگرنگی پاراستنی ئارامی و سەقامگیری ناوچەكە كردۆتەوە، هەروەها كۆكیش بون لەسەر مەترسییەكانی تیرۆرو سەرهەڵدانەوەی داعش كە هەڕەشەیەكی راستەقینەیە لەسەر ئارامی و سەقامگیریی عیراق و سوریا، هەروەها بۆ بەرەنگاربونەوەی ئەو مەترسییە پێویست زانراوە ئارامی و سەقامگیری لە ناوچەكە پارێزراو بێت و هەموان لەم پێناوەدا هەوڵ و كۆششیان بخەنەگەڕ.
لای خۆیەوە نێچیرڤان بارزانی وێڕای دەربڕینی سوپاسی هەرێمی كوردستان بۆ پشتگیری و یارمەتیدانی ئەمریكا بۆ عیراق و هەرێمی كوردستان دووپاتیكردۆتەوە كە كلیلی سەقامگیری و چارەسەركردنی كێشەكانی عیراق، چارەسەركردنی كێشەكانی هەولێرو بەغدایە بەگفتوگۆ و بەپێی دەستور.
راشگەیەنراوە كە لە كۆبونەوەكەدا پەیوەندییەكانی عیراق و هەرێمی كوردستان لەگەڵ وڵاتانی دراوسێ و ناوچەكە، دوایین پێشهاتەكانی دۆخی ناوچەكە بەگشتی و چەند پرسێكی جێی بایەخی هاوبەش تەوەرێكی دیكەی كۆبونەكە بوە.
