چوارچێوەی هەماهەنگی داوا لە پارتی دیموكراتی كوردستان و یەكێتی نیشتمانی كوردستان دەكات، كاندیدێك بۆ پۆستی سەرۆك كۆمار یەكلایی بكەنەوە.
چوارچێوەی هەماهەنگی دوای كۆبوونەوەی لە راگەیەندراوێكدا جەختی لەوە كردووەتەوە، لە كۆبوونەوەكەدا دوایین پێشهاتەكانی گۆڕەپانی سیاسی و دوایین گۆڕانكارییەكانی پەیوەست بە پێكهێنانی گەورەترین فراكسیۆن و كاركردنی ئەو لیژنانەی بەمدواییە چوارچێوەكە پێكیهێناوە كە تایبەتە بە گفتوگۆكردن لەگەڵ لایەنە سیاسییەكان و ئامادەكردنی بەرنامەی حكومەت و پێوەر و میكانیزمەكانی دیاریكردنی سەرۆك وەزیران و وەزیرەكان بە شێوەیەك كە گونجاو بێت لەگەڵ گرنگی و هەستیاریی قۆناغەكە، گفتوگۆیان لەسەر كراوە.
چوارچێوەی هەماهەنگی داواشی لە لایەنە كوردییەكان كردووە، هەوڵەكانیان یەكبخەن و كار بكەن بۆ یەكلاكردنەوەی كاندیدی سەرۆك كۆمار، بۆ تەواوكردنی بەركەوتە دەستوورییەكانی دیكە.
سەرەڕای ئەوەی لە مانگی 10ی ساڵی رابردووەوە هەڵبژاردنی پەرلەمانی عیراق ئەنجام دراوە، تاوەكو ئێستا حكومەت پێكنەهێنراوە، رێكنەكەوتنی یەكێتی و پارتیش لەسەر پۆستی سەرۆك كۆمار یەكێكە لە بەربەستەكان.
