عەلی باپیر ئەمیری كۆمەڵی دادگەری كوردستان سەرپەرشتی كۆبونەوەی ئەنجومەنی باڵای كردوەو تیایدا هەڵسەنگاندنیان بۆ سێ ساڵ كاركردنی كابینەوەی نۆیەمی حكومەتی هەرێم كردوە،
بەپێی راگەیەنراوێكی كۆمەڵی دادگەریی كوردستان، لەو كۆبونەوەیەدا وێڕای باسكردنی بارودۆخی خراپی هەرێم‌و دۆخی چەقەبەستوی عیراق، ئەنجومەنی باڵای كۆمەڵی دادگەریی هەڵسەنگاندنی سەرەتایی بۆ سێ ساڵ كاركردنی كابینەی نۆیەمی حكومەتی هەرێمی كوردستان كردوەو جەختیكردۆتەوە، حكومەتی هەرێم لەماوەی رابردودا شكستی لە چەندین كەرت‌و كایەدا هێناوە بەرپرسیاری یەكەمیش لەم شكستە لایەنە سەرەكییەكانی پێكهێنەری حكومەتن.
هەر لە كۆبونەوەكەدا دوپاتیكراوەتەوە، هەموو رێكارە مەدەنییەكان دەگرێتەبەر بەمەبەستی پاراستی پیرۆزییەكانی ئایینی ئیسلام لەكۆمەڵگاو رێگانەدان بە هەر تەوژم‌و لایەنێك كە بیەوێت سنوری پیرۆزییە ئاینییەكانی گەل ببەزێنێت.
هەروەها هاتوە كە نیگەرانی خۆیان لە بەرزبونەوەی نرخی شتومەك لە بازاڕەكانی هەرێمی كوردستان دەربڕیوەو هۆكاری ئەو گرفتەشی بۆ جدی نەبون لە دۆزینەوەی پلانی گونجاو و پشتیوانی نەكردنی حكومەت بۆ بازرگانان گەڕاندۆتەوە.
