ئاسۆ كەمال بەڕێوەبەری كەشناسی پارێزگای سلێمانی رایگەیاند، لەمڕۆ پێنجشەممەوە پلەكانی گەرما زیاتر بەرز دەبنەوە و لە هەندێك ناوچە دەگاتە 50 پلەی سەدی.
ئاسۆ كەمال بە میدیاكانی وتووە، لەمڕۆ پێنجشەممەوە پلەی گەرما بەرزدەبێتەوە و كۆتایی ئەم هەفتەیە و سەرەتای هەفتەی داهاتوو بەرزتر دەبێتەوە و دواتریش نزم دەبێتەوە.
رونیشیكردووەتەوە، هەرێمی كوردستان كەوتووەتە نێو چلەی هاوین و لەم 40 رۆژانەدا بەرزترین پلەی گەرما تۆمار دەكرێت، هۆكارەكانی بەرزی پلەی گەرماش لەو ماوەیەدا ئەوەیە لە 24 كاتژمێری شەو و رۆژێكدا نزیكەی 14 كاتژمێر رۆژە، بەدرێژایی ئەو 14 كاتژمێرە زەوی تیشكی خۆر هەڵدەمژێت و دواتر تیشك دەداتەوە.
بەڕێوەبەری كەشناسی پارێزگای سلێمانی جەختی لەوەش كردووەتەوە، پێشبینی ناكرێت پلەی گەرما لە هەولێر و سلێمانی و دهۆك بگاتە سەروو 50 پلە، بەڵام بۆ ناوچەكانی گەرمیان ئەو پێشبینییە دەكرێت.
