مامۆستایانی وانەبێژ لەشاری سلێمانی رایانگەیاند تائێستا شایستەی دارایی مانگی پێنجی رابردویان پێنەدراوەو پارەكەیان كورتهێنانی موچەی پێ پڕكراوەتەوە.
محەمەد كەمال نوێنەری مامۆستایانی وانەبێژ لە پرێس كۆنفرانسێكدا رایگەیاند: تائێستا شایستەی دارایی مانگی پێنجی رابردویان وەرنەگرتوەو دوای بەدواداچونیان پێیانڕاگەیاندون كە دابەشكردنی موچە كورتهێنانی هەبوەو پارەی مامۆستایانی وانەبێژ بەكارهێنراوە بۆ پڕكردنەوەی ئەو كورتهێنانە، واتە موچەكەمان خوراوەو كەموكورتی وەزارەتەكانی پێ پڕكراوەتەوە.
وتیشی: مامۆستایانی وانەبێژ یەكجەستەین و ئیدانەی ئەو دەستدرێژیانە دەكەین كە لەبەرامبەر مامۆستایانی وانەبێژ كراوە لەبەردەم بانكی كەلار، ئەوان داوای مافی سێ مانگ پێش ئێستای خۆیانكردوە.
لەبەشێكی تردا رایگەیاند، داواكارن لە وەزارەتی پەروەردەو دارایی حكومەتی هەرێم پێش دەستپێكردنی خوێندنی ساڵی نوێ كێشەی مامۆستایانی وانەبێژ بە دامەزراندن چارەسەر بكەن، چونكە دامەزراندن ئەو گرێیەیە كە هەموو گرێ بچوكەكانی مامۆستایانی وانەبێژ دەكاتەوە.
