قوباد تاڵەبانی جێگری سەرۆكی حكومەتی هەرێم لەبارەی هێرش و تۆپبارانەكانی توركیا دەڵێت، ئەگەر پێشتر حكومەتی عیراق هەڵوێستی هەبوایە بەرامبەر كوژرانی دەیانی هاوڵاتی هەرێمی كوردستان ئەستەم بوو ئەم رۆژانە تاوانەكەی سەیرانگای پەرەخ رویدابایە.
قوباد تاڵەبانی لە پەیامێكدا بڵاویكردووەتەوە، لە گەرمای تەموزی بەغداد و باشورەوە هاتبوون تاوەكو جەستەی خۆیان بدەنە بەر فێنكایی تاڤگە و شنەبای سەیرانگا و هاوینە هەوارەكانی كوردستان، كەچی بەداخەوە جەستەی خوێناویی بێ گیانیان رادەستی كەسوكار و خانەوادەكانیان كرایەوە.
باسی لەوەش كردووە، تاوانە گەورەكە ویژدانی هەموو هاوڵاتیانی عیراقی هەر لە دهۆك و هەولێر و سلێمانییەوە تاوەكو بەغداد و نەجەف و بەسرەی هەژاند، بۆ ئێمە لە هەرێمی كوردستان واتایەكی دیكەشی هەبوو، هاوڵاتیانی كوردستان دووجار ویژدانیان هەژا، جارێكیان وەك هەر مرۆڤێكی خاوەن ویژدان، وەك هەر هاوڵاتیەكی دیكەی عیراق خەمبار و دڵگران بوون بەو رووداوە دڵتەزێنە و شەهیدبوونی 9 هاوڵاتی مەدەنی، جارەكەی دیكەشیان وەك كوردێكی بێكەس و بێ پشتوپەنا، كە بەردەوام قوربانین و كەس هاواریان نابیستێت.
جێگری سەرۆكی حكومەتی هەرێم پرسیاری ئەوەش دەكات، لەماوەی چەند ساڵی رابردوودا سەرووی 100 هاوڵاتی مەدەنی هەرێمی كوردستان بەهۆی بۆردومانە بەردەوامەكانەوە شەهید بوون، بۆ حكومەتی فیدراڵ جارێك هەڵوێستێكی جدی نەبوو؟، ئەگەر پێشتر هەڵوێستی جدی هەبوایە رەنگ بوو كارەساتی بەر لەچەند رۆژی رابردومان نەدیبایە، گەنجێكی جوان لەمانگی هەنگوینیی خۆیدا شەهید نەبوایە، لاشەی بێ گیانی منداڵێكمان بەفرۆكە رەوانەی بەغدا نەكردایە.
