ئەحمەد موسەوی ئەندامی پەرلەمانی عیراق لەسەر پشكی فراكسیۆنی سادقون دەڵێت، حەیدەر عەبادی لە دەرەوەی حساباتی دیاری كردنی سەرۆك وەزیرانە و بۆ پۆستی سەرۆك كۆماریش دەنگ دەدەن بە بەرهەم ساڵح.
ئەو پەرلەمانتارە لە بەرنامەیەكی تەلەفزیۆنیدا وتویەتی، بۆردومانەكەی توركیا پێشێلكردنی سەروەری عیراقە و لە كۆبوونەوەی پەرلەماندا وەزیری دەرەوە وتویەتی كە 22 هەزار جار سەروەری عیراق لەلایەن توركیاوە پێشێلكراوە، ئەی وەزارەتی دەرەوەی لە كوێ بووە؟، لە كۆبوونەوەكەشدا پەرلەمان هیچ وەڵامدانەوەیەكی بۆ ئەو دەستدرێژیانە ئامادە نەكردووە.
رونیشیكردووەتەوە، پەرلەمان پێشتر بڕیاری داوە كە پێویستە هێزە بیانییەكان خاكی عیراق جێبهێڵن، بەڵام حكومەتی كازمی رێگەی بە سوپای توركیا داوە لەخاكی عیراقدا بمێننەوە.
سەبارەت بە دیاری كردنی سەرۆك كۆمار موسەوی وتویەتی، چوارچێوەی هەماهەنگی بڕیاریداوە ئەگەر كورد زیاتر دوابكەون چیتر چاوەڕێ نەكات و هەفتەی داهاتوو كۆبوونەوەی هەڵبژاردنی سەرۆك كۆمار ببەسترێت و فراكسیۆنی سادقون دەنگ بە بەرهەم ساڵح دەدات.
هەرچی سەبارەت بە كاندیدەكانی پۆستی سەرۆك وەزیرانە ئەو پەرلەمانتارە هێمای بۆ ئەوە كردووە، سەركردەكانی هێڵی پێشەوە كە نوری مالیكی و هادی عامی و حەیدەر عەبادین دوور خراونەتەوە و كاندید ناكرێن.
