لەبارەی هێرشەكەی سەر كێڵگەی غازی كۆرمۆر وەزارەتی سامانە سروشتییەكان ئاشكرای كرد، هیچ كاریگەریەكی لەسەر پرۆسەی بەرهەمهێنانی غاز نەبووە.
وەزارەتەكە لە راگەیەندراوێكدا ئاماژەی بەوەداوە، كاتژمێر 7:55ی ئێوارەی رۆژی دووشەممە هێرشی موشەكی كرایە سەر كێڵگەی غازی كۆرمۆر، بەڵام خۆشبەختانە هیچ زیانی گیانی نەبووە و كاریگەریشی لەسەر پرۆسەی بەرهەمهێنانی غازی سرووشتی نەبووە.
رونیشكراوەتەوە، لە ماوەی مانگی حوزەیران و تەموزی ئەمساڵ، بۆ جاری چوارەمە هێرش دەكرێتە سەر كێڵگەی كۆرمۆر، وەزارەتی سامانە سرووشتییەكان بە توندی ئەم هێرشە شەرمەزار دەكات كە چەندین جارە ژێرخانی مەدەنی هەرێمی كوردستان دەكرێتە ئامانجی هێرشی موشەكی گروپە چەكدارە لە یاسادەرچووەكان.
هەر بەپێی راگەیەندراوەكە، كێڵگە نەوتییەكانی هەرێم سامانی خەڵكی كوردستانن، هەر جۆرە هێرشێك بۆ سەر دامەزراو و ژێرخانە ئابورییەكانی هەرێم بە ئامانجگرتنی راستەوخۆی خەڵكی كوردستانە و بە هیچ شێوەیەك قابیلی قبوڵ نییە و بەرپرسیارێتی ئەم هێرشانەش لە ئەستۆی ئەو لایەنانەیە كە لە ناوچەكانی ژێر دەسەڵاتیان سامانی گەلی كوردستان دەكرێتە ئامانج.
