محەمەد بەلداوی ئەندامی پەرلەمانی عیراق لە هاوپەیمانی فەتح دەڵێت، عیراق هەموو توانایەكی هەیە بۆ سزادانی توركیا بەهۆی هێرشەكەی زاخۆ و داگیركردنی بەشێك لە خاكی عیراق.
محەمەد بەلداوی لە لێدوانێكی رۆژنامەوانیدا وتویەتی، عیراق دەرفەتی لەبەردەستە بۆ ئەوەی پەستان بخاتە سەر توركیا لە لایەنی ئابوریی و بازرگانییەوە، دەتوانرێت پەستان بخرێتە سەر ئەنقەرە بۆ وەستاندنی پێشێلكاریەكانی هەروەها گرەنتیكردنی پشكی ئاوی عیراق.
رونیشیكردووەتەوە، چارەسەری ئابوریی و پەستان خستنە سەر توركیا پێویستی بە داخستنی سنورەكانە لەگەڵ ئەو وڵاتە و كردنەوەی دەروازەكان لەگەڵ وڵاتانی تری هاوسێ، هەروەها كاراكردنی بەندەرەكانە بۆ قەرەبووكردنەوەی كاڵای توركی، بەتایبەتی كە ئەو وڵاتە لە رێگەی بازرگانی و گەشتوگوزارەوە لەسەر عیراق دەژی.
ئەو پەرلەمانتارە جەختی لەوەش كردووەتەوە، پێویستە سزای حكومەتەكەی ئەردۆغان بدرێت و گرەنتی دەستخستنی قەرەبووی قوربانیەكان بكرێت، ئەوەش لە رێگەی جوڵەی ناوخۆیی و دەرەكی و پابەندكردنی ئەنقەرە بەوەی كە دەست لەكاروباری ناوخۆی عیراق وەرنەدات و نەیەتە خاكەكەیەوە.
