بەهۆی بەردەوامی بڵاوبوونەوەی ئاوڵەی مەیمون، ولایەتی نیویۆرك كە تاوەكو ئێستا هەزار و 345 حاڵەتی تێدا تۆمار كراوە، باری لەناكاوی راگەیاند.
لەو بارەیەوە كاسی هۆكول حاكمی ولایەتی نیویۆرك رایگەیاندووە، راگەیاندنی باری لەناكاو لە نیویۆرك بۆ پاڵپشتی كردنی هەوڵەكانیانە بۆ روبەڕوبوونەوەی نەخۆشی ئاوڵەی مەیمون، بەهۆی ئەوەش وەڵامدانەوەی نەخۆشیەكە باشتر دەبێت و دابەشكردنی ڤاكسینیش خێراتر دەبێت.
رونیشیكردووەتەوە، ئێستا نیویۆرك بووەتە مەڵبەندی بڵاوبوونەوەی نەخۆشییەكە، لە هەر 4 توشبوویەك لە ئەمریكا یەكیان لە نیویۆركە، بۆیە پێویستیان بە بەكارهێنانی سەرجەم ئەو پێداویستییانەیە كە هەیانە.
زۆرترین توشبووی ئاوڵەی مەیمون لە ئەمریكا لە ولایەتی نیویۆرك تۆمار كراوە و تاوەكو ئێستا هەزار و 345 كەس توشبوون، بەدوای ئەویشدا ولایەتی كالیفۆرنیایە كە 700 توشبووی تۆمار كردووە، پێشتریش شاری سانفرانسیسكۆ لە ولایەتی كالیفۆرنیا باری لەناكاوی راگەیاند.
