د. پێشڕەو حەمەجان یاریدەدەری سەرۆكی زانكۆی سلێمانی بۆ كاروباری خوێندكاران سەبارەت بە بڕیاری یەكپۆشی خوێندكاران رایگەیاند، زۆرینەی خوێندكاران لەگەڵ یەكپۆشین.
د.پێشڕەو لە لێدوانێكی رۆژنامەوانیدا وتویەتی، راپرسییەكیان راگەیاندووە بۆئەوەی بۆچوونی خوێندكاران لە بارەی یەكپۆشی وەربگرن، تاوەكو ئێستا بەگوێرەی وەڵامدانەوەكان بەشێكی زۆری خوێندكاران دەیانەوێت سیستمی یەكپۆشی پەیڕەو بكرێت.
سەبارەت بە بڕیاردان لەو بارەیەوە هێمای بۆ ئەوە كردووە، هیچ كاتێكیان بۆ كۆتاییهاتنی راپرسییەكە دیاری نەكردووە، دوای وەرگرتنی ئەنجامێكی گشتی، ئاڕاستەی ئەنجومەنی زانكۆ دەكرێت بۆ ئەوەی بڕیاری یەكلاكەرەوە بدرێت.
پێشتریش زانكۆی سەڵاحەدین لە هەولێر هەمان راپرسی ئەنجامداوە و بەپێی ئەنجامەكانیش زۆرترین خوێندكار لەگەڵ یەكپۆشین و لەئێستا جێبەجێكردنی بڕیارەكە تاووتوێ دەكرێت.
