دوای ئەوەی وێستگەی “زابۆریجیا”ی ئەتۆمی كە گەورەترین وێستگەی ئەتۆمی ئەوروپایە و دەكەوێتە ئۆكرانیاوە لەلایەن روسیاوە بۆردومان كرا، ڤۆلۆدیمێر زیلینسكی سەرۆكی ئۆكرانیا هۆشداری لە كارەساتێكی ئەتۆمی دەدات.
زیلینسكی رایگەیاندووە، پێویستە جیهان ئەوە لەبیر نەكات كە لە “تشێرنۆبڵ” روویدا، هەروەها پێویستە ئەوە بزانن كە وێستگەی ئەتۆمی “زابۆریجیا” گەورەترین وێستگەیە لە ئەوروپا.
سەرۆكی ئۆكرانیا جەختی لەوەش كردووەتەوە، لە كارەساتی تشێرنۆبڵ تەنها یەك كارلێكەری ناوەكی تەقییەوە بەڵام زابۆریجیا 6 كارلێكەری ناوەكی هەیە.
لەساڵی 1986 و لەسەردەمی یەكێتی سۆڤیەتدا وێستگەی ئەتۆمی تشێرنۆبڵ لە ئۆكرانیا تەقیەوە، كە ئەوەش بە گەورەترین كارەساتی تیشكدانەوەی ئەتۆمی لە جیهاندا پێناسە دەكرێت، بەپێی زانیاریەكانی نەتەوە یەكگرتووەكان زیاتر لە 4 هەزار كەس بەهۆی ئەو روداوەوە گیانیان لەدەستدا.
بەڵام بەپێی زانیاریەكانی دەسەڵاتدارانی ئۆكرانیا ژمارەی قوربانیەكان زیاتر بوون لە 8 هەزار كەس، رێكخراوە نێودەوڵەتیەكانیش باس لەوەدەكەن، زیاتر لە 10 هەزار كەس گیانیان لەدەستداوە و زیاتر لە 90 هەزار كەس بەهۆیەوە تووشی تێرپەنجە بوون و كۆی گشتی گیانلەدەستدان بەهۆی كارەساتەكەوە زیاترە لە 93 هەزار كەس.
