ئەنجومەنی باڵای دادوەریی عیراق رایگەیاند، رێوشوێنی یاسایی بەرامبەر وەزیری پێشووی پیشەسازی گرتووەتە بەر كە لە گرتەیەكی ڤیدیۆییدا دەردەكەوێت سوێندی دڵسۆزی بۆ سەركردەیەی حزبێكی سیاسی دەخوات.
ئەنجومەنەكە لە بەیاننامەیەكدا ئاشكرای كردووە، دادگای لێكۆڵینەوەی كەرخ رێوشوێنی یاسایی بەرامبەر ساڵەح عەبدوڵڵا جبوری وەزیری پێشووی پیشەسازی گرتووەتەبەر.
باس لەوەشكراوە، ئەوەش لەپێناو لێكۆڵینەوە لەو گرتە ڤیدیۆییەی كە تێیدا دەردەكەوێت و سوێند دەخوات كە كار بۆ بەرژەوەندی لایەنێكی سیاسی بكات.
لە چەند رۆژی رابردوودا گرتەیەكی ڤیدیۆ بڵاوكرایەوە كە پیشانی دەدات وەزیری پێشووی بازرگانی عیراق، قورئانێكی پیرۆزی لەبەردەستدایە و سوێند بۆ ئەحمەد جبوری ناسراو بە “ئەبو مازن” كە سەرۆكی حزبێكە و پاڵاوتوویەتی بۆ ئەو پۆستە دەخوات كە كار بۆ بەرژەوەندییەكانی حزبەكە بكات و ئەوەش لەناو شەقامی عیراقیدا هەڵایەكی گەورەی دروست كرد.
