لایەنگرانی موقتەدا سەدر رێبەری رەوتی سەدر چوونە بەردەم ئەنجومەنی باڵای دادوەریی و مانگرتنیان راگەیاند و ئەنجومەنەكەش كارەكانی هەڵپەسارد.
ئەمڕۆ سێشەممە، لایەنگرانی سەدر چوونە بەردەم ئەنجومەنی باڵای دادوەریی و 5 داواكارییان راگەیاند، كە بریتی بوون لە هەڵوەشانەوەی پەرلەمان و دیاری كردنی وادەی هەڵبژاردنی پێشوەختە و بە سیاسی نەكردنی دەسەڵاتی دادوەریی، هەروەها بەرەنگاربوونەوەی گەندەڵی و گەندەڵكاران و جیاكردنەوەی داواكاری گشتی لە ئەنجومەنی دادوەریی بەشێكی تر بوون لە داواكارییەكان.
لایەنگرانی سەدر لەبەردەم ئەنجومەنەكە خێمەیان هەڵدا و دەستیان كرد بە مانگرتن و جەختیان لەوە كردەوە، پێویستە ئەوانەی وڵاتیان گەیاندە بارودۆخی ئێستا بڕۆنە دەرەوە ئەگەرنا دەیڕوخێنن بەسەر گەندەڵكاراندا و هیچ ئەگەرێكی دیكەیان لەبەردەستدا نییە.
لای خۆشیەوە ئەنجومەنی دادوەریی كارەكانی هەڵپەسارد و جەخت لەوە دەكاتەوە، خۆپیشاندان لەبەردەم بارەگاكەیان نادەستوریی و پێچەوانەی یاسایە، لە رێگەی نامەی مۆبایلەوە هەڕەشەیان لێكراوە و هەڵپەساردنی كارەكانیشیان وەك ناڕەزایەتییە بەرامبەر ئەو كارە و بەرپرسیارێتی ئەو كارە نایاساییەش دەكەوێتە ئەستۆی حكومەت و ئەو لایەنە سیاسیەی لە پشتیەوەیەتی.