دەستەی گشتی گەشتوگوزاری هەرێمی كوردستان شوێنە گەشتیاریەكان پابەندی زمانی كوردی دەكات و سزاكەی هەڵوەشاندنەوەی مۆڵەت دەبێت لەكاتی پابەند نەبوندا.
بەپێی فەرمانێكی كارگێڕی دەستەی گشتی گەشتوگوزاری هەرێم كە واژۆی ئەمەل جەلال سەرۆكی دەستەی گشتی گەشتوگوزاری لەسەرە، سەرجەم هۆتێل و مۆتێل و كافێ و رێستۆرانت و ئەو شوێنە گەشتیاریانەی خزمەتگوزاری گەشتیارییان تیادا پێشكەش دەكرێت پابەند دەكات بەوەی پێویستە زمانی كوردی بكەن بە زمانێكی سەرەكی بۆ لیستی پێشكەشكردنی خواردنەكان و تابلۆی ناوی بازرگانی شوێنەكانیان، بۆ جێبەجێكردنی بڕیارەكەش تەنها وادەی 15 رۆژ دیاریكراوە.
هەر لە فەرمانەكەدا هاتوە، پابەندكردنی سەرجەم ئەوشوێنانەی خاوەنی مۆڵەتی گەشتیارین دەبێت زمانی كوردی وەك زمانی سەرەكی و یەكەم، پاشان هەر زمانێكی تری بیانی بنوسرێت، سەرجەم بەڕێوەبەرایەتییە گشتییەكان و لیژنە تایبەتەكانیشی راسپاردوە بۆ بەدواداچون بە جێبەجێكردنی بڕیارەكە.
لەبارەی سزاشەوە هاتوە كە سزای دیاریكراوی سەرپێچیكاران تۆمار دەكرێت بە داخستنی شوێنەكە بۆماوەی سێ رۆژ دەستپێدەكات، لە ئەگەری دوبارەبونەوە یان زیاتر شوێنەكە بۆ ماوەی حەوت رۆژ تا بە هەڵوەشاندنەوەی مۆڵەتی شوێنە گەشتیارییەكە كۆتایی دێت.
