جوتیار عـادل وتەبێژی حكـوومەتی هـەرێمی كوردستان دەڵێت، سەرەڕای ئەوەی ئەمساڵ بەغدا تەنها دوو جار 200 ملیار دینارەكەی هەرێمی ناردووە، بەڵام حكومەتی هەرێم كارەكانی رایی كردووە و موچەی دابین كردووە.
جوتیار عادل بە میدیای پارتی وتووە، لە كابینەی نۆیەم یاسای چاكسازی دەركرا بۆ ئەوەی دادپەروەری كۆمەڵایەتی پەیڕەو بكەن، هەروەها توانییان هەنگاوی باش بنێن و سەقامگیری ئەمنی چارە بكەن، هەر لەم كابینەیەدا توانرا پرسی موچە چارەسەر بكرێت، لە هەموو لایەك هەوڵیان داوە سەقامگیری بۆ خەڵك مسۆگەر بكەن.
باسی لەوەش كردووە، ئەو پرۆژانەی وەستابوون دەستیان پێ كراوەتەوە و پرۆژەی نوێش لە چەندین بوار كاری لەسەر كراوە، هەنگاوەكانمان بەو ئاڕاستەیە كە ئایندەی نەوەكانمان مسۆگەر بكەین، كابینەی نۆیەم دەستپێشخەر بووە لە پرسی شەفافیەت و هەر لەسەر ئەو بنەمایە تونراوە بەشی بەرچاوی ئاڵنگاریەكان تێپەڕێنین.
وتەبێژی حكومەتی هەرێم هێمای بۆ ئەوەش كردووە، حكومەت دەستەوەستان نەبووە بۆ دابینكردنی موچە و شایستە داراییەكانی فەرمانبەران و خەڵك، بەڵام لەلایەن حكومەتی فیدراڵ بە مەركەزییەت مامەڵە لەگەڵ هەرێم دەكرێت و لە پرسی فیدراڵی نەگەیشتوون، ئەمساڵ تەنها 2 مانگ 200 ملیار دینارەكە نێردراوە، بەڵام حكومەت لە راییكردنی كارەكان و دابینكردنی موچە نەوەستاوە، پێشی وایە كە خەڵكانێك هەن لە سەركەوتنەكانی ئەو كابینەیە نیگەرانن.
