هاوپەیمانی دەوڵەتی یاسا لەپەرلەمانی عیراق جەخت لەوە دەكاتەوە، ئەگەر هەرێمی كوردستان داهاتە نەوتییەكان رادەستی بەغدا نەكات، ئەوا بودجەكەی دەبڕدرێت.
جاسم موسەوی ئەندامی فراكسیۆنی هاوپەیمانی دەوڵەتی یاسا رایگەیاندووە، دوای بڕیاری دادگای فیدراڵی لەسەر نایاسایی بوونی هەناردە كردنی نەوتی هەرێمی كوردستان، بڕیارە چەند كۆبوونەوەیەك بۆ چارەسەری كێشەی هەناردە كردنی نەوتی عیراق و رێككەوتن لەگەڵ هەرێم بەڕێوە بچێت.
رونیشیكردووەتەوە، بەپێی بڕیارەكە پێویستە حكومەتی عیراق پەیام بۆ ئەو كۆمپانیایانە بنێرێت كە لە كەرتی نەوتی هەرێم كار دەكەن و هۆشداری ئەوەیان پێبدات كە چالاكییەكانیان نایاساییە و پێویستە وەڵامیان بۆ ناوەندە یاساییە عیراقی و نێودەوڵەتییەكان هەبێت.
مەلەفی نەوت یەكێكە لەو مەلەفانەی ساڵانێكی زۆرە بووەتە كێشە لە نێوان هەرێمی كوردستان و حكومەتی عیراق و تاوەكو ئێستا چارەسەرێكی بنەڕەتی بۆ نەدۆزراوەتەوە، بەهۆیەوە چەندین جار پشكی بودجەی هەرێم بڕدراوە و هەرێمیش رادەستكردنی نەوت رەتدەكاتەوە.
لە كۆتا لێدوانیشدا جوتیار عادل وتەبێژی حكومەتی هەرێم ئەوەی ئاشكرا كرد، ئەمساڵ حكومەتی عیراق تەنها دوو مانگ 200 ملیار دیناری پشكی هەرێمی ناردووە.
