سالار مەحمود چاودێری سیاسی و راوێژكاری پێشوو لە سەرۆكایەتی كۆماری عیراق پێی وایە، دۆخی عیراق بۆ كورد هیوا بەخش نییە، چونكە لایەنەكان كار بۆ رێككەوتن لەسەر پۆست دەكەن نەك ئیستیحقاقی خەڵكی كوردستان.
سالار مەحمود بە دەنگی ئەمریكای وتووە، گەر نوری مالیكی و هاوپەیمانەكانی نەگەنە سیغەیەك بۆ رێككەوتن لەسەر كۆی پرۆسەی سیاسی لە عیراق بە شێوەیەك رەوتی سەدر رازی بكەن، ئەوا دوای چلەی ئیمام حسێن دۆخی عیراق بەرەو خراپی دەڕوات بە دوو ئاڕاستە، ئاراستەیەكیان تشرینیەكان و ئاڕاستەكەی تر رەوتی سەدر.
پێشی وایە، دۆخەكە بۆ كورد هیوا بەخش نییە، چونكە لایەنەكان كار بۆ رێككەوتن لەسەر پۆست دەكەن نەك ئیستیحقاقی دەستوریی خەڵكی كوردستان، لەولاشەوە وڵاتانی هەرێمی پێچەوانەی خواستەكانی كورد دەستوەردان دەكەن، بێگومان ئەوەشی پرۆسەی سیاسی ئاڕاستە دەكات ئیرادەی ئیقلیمییە نەك ناوخۆیی.
ئەو چاودێرە سیاسیە وتوشیەتی، كاركردن بە میكانیزمی پشك پشكێنە وادەكات دۆخی عیراق ئارامی بە خۆوە نەبینێت، بەتایبەت گەر هەوڵی پەراوێزخستنی سەدر بدرێت، سەدر لە یارییەكە نەكشاوەتەوە و هەموو جوڵەیەكی مانۆڕی سیاسییە، پێكهێنانی حكومەت لەگەڵ هاوپەیمانەكانی پێشووی سەدر دۆخێكی نەخوازراو دروست دەكات، چونكە سەدر پەراوێزخستن قبوڵ ناكات.