عەلی حوسێن ئەندامی سەركردایەتی پارتی دەڵێت، لەگەڵ یەكێتیدا گەیشتوونەتە ئەو بڕوایەی كە دەبێت بۆ پاراستنی بەرژەوەندییەكانی هەرێمی كوردستان بە یەك كاندیدی هاوبەشی سەرۆك كۆمارەوە بچنە بەغدا.
عەلی حوسێن لە چاوپێكەوتنێكی تەلەفزیۆنیدا باسی لەوە كردووە، پارتی پێی وایە پۆستی سەرۆك كۆمار سیادییە و پێویستە بۆ بەرژەوەندی هەرێم سودی هەبێت، هەماهەنگی تەواوی لەگەڵ نوێنەرانی كورد لە بەغدا هەبێت، بەڵام ئێستا هەردوو لایەنی پارتی و یەكێتی گەیشتونەتە ئەو بڕوایەی دەبێت بۆ پاراستنی بەرژەوەندی هەرێم و رەواندنەوەی مەترسییەكان بەیەك كاندیدی هاوبەش بچنە بەغدا.
جەختی لەوەش كردووەتەوە، كێشەكانی عیراق هیچ كاتێك كێشەی پەیوەست بە سەرۆك كۆمارەوە نەبووە، پێی وانییە ئەوە كێشەبوبێت، راستە پارتی و یەكێتی تێگەیشتنیان جیاوازە بەڵام كێشەی عیراق زۆر لەوە گەورەترە لە پۆستی سەرۆك كۆماردا كورت بكرێتەوە.
لەبارەی گفتوگۆكان لەگەڵ چوارچێوەی هەماهەنگی ئەو بەرپرسەی پارتی باسی لەوە كردووە، گفتوگۆكان بەو ئاراستەیەن كە لایەنەكانی چوارچێوەی هەماهەنگی رازین بە داواكارییەكانی كورد و جەختیان لەسەر ئەوە كردووەتەوە كە بۆ كێشەكانی سنوری ماددەی 140 و كەركوك، شنگال، یاسای نەوت و غاز، دەسەڵاتەكانی هەرێم، دارایی و پشكی هەرێم لە بودجەدا، بگەڕێنەوە بۆ چارەسەرە دەستورییەكان.