بە زۆرینەی دەنگی ئەندامانی پەرلەمانی كوردستان، تەمەنی ئەم خولەی پەرلەمان تاوەكو كۆتایی وەرزی دانانی خولی پاییزە كە دەبێتە كۆتایی ساڵی 2023 درێژكرایەوە.
ئەمڕۆ یەكشەممە 9ی تشرینی یەكەمی 2022، پەرلەمانی كوردستان بۆ دەنگدان لەسەر پێشنیازە یاسای درێژ كردنەوەی تەمەنی خۆی كۆبوویەوە، كە لەلایەن فراكسیۆنەكانی پارتی و یەكێتی و كەمە نەتەوەكان و بەشێكی فراكسیۆنی گۆڕانەوە پشتگیری دەكرا.
دوای دەستپێكردنی دانیشتنەكە پێشنیازە یاساكە خرایە دەنگدانەوە و بە زۆرینەی دەنگ و بەدەنگی 80 پەرلەمانتار پەسەند كرا.
ئەو پێشنیازە یاسایە ناڕەزایی زۆری بەدوای خۆیدا هێنا و فراكسیۆنەكانی یەكگرتوو و كۆمەڵی دادگەری و نەوەی نوێ و بەشێكی پەرلەمانتارانی فراكسیۆنی گۆڕان و بەشێكی پەرلەمانتارە سەربەخۆكان رەتیان كردەوە، فراكسیۆنەكانی یەكگرتوو و كۆمەڵیش بایكۆتی دانیشتنەكەیان كرد.
فراكسیۆن و پەرلەمانتارە ناڕەزاییەكان جەخت لەوە دەكەنەوە، درێژكردنەوەی تەمەنی پەرلەمان نایاساییە و پێویستە هەڵبژاردن ئەنجام بدرێت، ئەو فراكسیۆنانەشی دەنگیان پێداوە باس لەوە دەكەن، وەك عورفێك تەمەنی پەرلەمان درێژ دەكەنەوە.
