كازم حەیدەری ئەندامی پەرلەمانی عیراق پێی وایە، دژایەتی كردنی كردنەوەی فڕۆكەخانەی كەركوك لەلایەن هەندێك لایەنی كوردی بەهۆی ئەوەوەیە كە، داهاتی فڕۆكەخانەی هەولێر كەمدەكات.
حەیدەری لە لێدوانێكی رۆژنامەوانیدا وتویەتی، لەماوەی چەند رۆژی رابردوو و لەدوای كردنەوەی فڕۆكەخانەی نێودەوڵەتی كەركوك، لەلایەن هەندێك لایەنی كوردییەوە هێرشێكی توندی كرایە سەر و هەوڵیاندا رێگری بكەن لەوەی دەست بەكارەكانی بكات.
ئاماژەی بەوەشداوە، هەوڵدان بۆ راگرتنی كارەكانی فرۆكەخانەكە و تۆمەت بۆ دروستكردنی تەنها بابەتێكی ئابورییە و ئەو لایەنەی لەپشت ئەو هەوڵەوە بوو بەشێوەیەك سەیری فڕۆكەخانەكە دەكات كە كاریگەریی لەسەر داهاتەكانی هەولێر بەگشتی و فڕۆكەخانەی نێودەوڵەتی هەولێر بەتایبەتی دەبێت.
ئەو پەرلەمانتارە هێمای بۆ ئەوەش كردووە، ئەو لایەنە كوردییە دەیەوێت خەڵكی كەركوك و سەڵاحەدین و پارێزگاكانی تر لە رێگەی فڕۆكەخانەی هەولێرەوە گەشتبكەن، بەڵام كردنەوەی فڕۆكەخانەی كەركوك كاریگەری لەسەر گۆڕینی ئاراستەی گەشتكردنیان دەبێت، لەدوای كردنەوەی فڕۆكەخانەكە داهاتی فڕۆكەخانەی هەولێر بۆ 70% كەمدەبێتەوە.
