دوای ئەوەی هاوڵاتییەكی ئەمریكی لە شاری بەغدا گیانی لەدەستدا، هێزەكانی كەنەداش ئاشكرایان كردووە، ئەفسەرێكیان لە بارودۆخێكی گوماناوی نادیاردا، لە بەغدای پایتەختی عیراق گیانی لەدەستداوە.
ئەكاونتی فەرمی هێزە چەكدارەكانی كەنەدا لە تۆڕی كۆمەڵایەتی تویتەر بڵاویكردووەتەوە، كاپتن “ئێریك شیۆنگ” رۆژی 5ی ئەم مانگە لە بارودۆخێكدا كە پەیوەندی بە شەڕكردنەوە نەبووە گیانی لەدەستداوە.
ئەوەش هاتووە، لە ئێستادا هێزەكانیان لە بەغدا لێكۆڵینەوە لە روداوەكە دەكەن، ناوبراو وەك بەڕێوەبەری جێبەجێكار لە بەڕێوەبەرایەتی پەیوەندییە ستراتیژییەكانی هێزی كاری هاوبەش كاری كردووە.
ئەوەش دوای ئەوەدێت، لەلایەكی ترەوە هاوڵاتییەكی ئەمریكی بەهەمان شێوە لەناوچەی كەرادەی ناوەڕاستی شاری بەغدا لەلایەن چەند چەكدارێكی نەناسراوەوە تەقەی لێكراو كوژرا.
