لەیس عەبدولحسێن بەڕێوەبەری گشتی فەرمانگەی یاسایی لە وەزارەتی نەوتی عیراق دەڵێت، بەشێك لە كارنامەی حكومەتی نوێ باس لە كێشەكانی نێوان هەرێم و بەغدا دەكات و گەشبینە لە چەند مانگی داهاتوودا ئەو كێشانە چارەسەر دەكرێن.
لەیس عەبدولحسێن بە میدیای پارتی وتووە، كێشەی نێوان هەولێر و بەغدا لە بواری نەوت بۆ تێگەیشتن و شیكردنەوەی بڕگەكانی دەستوور دەگەڕێتەوە، بەڵام نزیكبوونەوە لەنێوان هەولێر و بەغدا هەیە.
ئاماژەی بەوەشداوە، بەشێك لە كارنامەی حكومەتی نوێ باس لە كێشەكانی نێوان هەردوولا دەكات، بۆیە گەشبینە بەوەی كە كێشەكان چارەسەر بكرێن، لە چەند مانگی داهاتوودا ئەو كێشانە چارەسەر دەكرێن.
بەڕێوەبەری گشتی فەرمانگەی یاسایی لە وەزارەتی نەوتی عیراق جەختی لەوەش كردووەتەوە، كارنامەی حكومەتی نوێی عیراق كە لەلایەن ئەنجوومەنی نوێنەرانی عێراقەوە پەسندكرا، بە روونی ئاماژە بە گرنگی چارەسەركردنی ناكۆكییە نەوتییەكانی نێوان بەغدا و هەولێر كراوە، ئەم ناكۆكییە چەندین ساڵە بەردەوامە و لە شەش مانگی داهاتوودا چارەسەر دەكرێت.
