واژۆ
مەسرور بارزانی سەرۆكی حكومەتی هەرێم، روداوێكی پەلاماردانی جوتیارانی كورد لەلایەن عەرەبی هاوردەوە لە سنوری كەركوك مایەی ئەوپەڕی نیگەرانییە و داوا دەكات بەپەلە كۆتایی بەو پەلامارانە بهێنرێت.
مەسرور بارزانی لە پەیامێكدا رایگەیاندووە، پەلاماردانی جوتیارانی كورد لە سنووری قەزای داقوقی سەر بە پارێزگای كەركووك مایەی ئەوپەڕی نیگەرانییە، داوا لە بەڕێزان سەرۆك كۆماری عیراق و سەرۆك وەزیران و سەرۆكی ئەنجومەنی نوێنەرانی فیدراڵ دەكات بە پەلە كۆتایی بە پەلاماردان و دەستدرێژی كردنە سەر جوتیارانی كورد لە سنوری داقوق و ناوچەكانی دیكەی كەركوك بهێنن كە لەلایەن كەسانی دەستڕۆیشتووەوە ئەنجام دەدرێت و بە شێوەیەكی نایاسایی هەوڵی دەركردنی كورد و دەستبەسەرداگرتنی زەویەكانییان دەدەن.
ئاماژەی بەوەشداوە، ئەم رەفتارانە دژی بنەماكانی بەیەكەوەژیانی ئاشتییانە و بڕگەكانی ماددەی 140ی دەستوری هەمیشەیی عیراقن و پێویستە دەزگا پەیوەندیدارەكانی حكومەتی فیدراڵ، سنورێك بۆ ئەم پێشێلكارییانە دابنێن.
ئێوارەی رۆژی چوارشەممە لە سنوری ئاواییەكانی دارا و مەنسور لە حەفتەغار لە سنوری كەركوك شەڕ لەنێوان جوتیارانی كوردی خاوەن زەوی و زاری ناوچەكە و عەرەبی هاوردە رویدا، ژمارەیەك زۆر عەرەبی هاوردەوە هێرشیان كردبووە سەر چەند جوتیارێكی كورد و 2 جوتیار بریندار ببوون.
