واژۆ
نوسینگەی محەمەد شیاع سودانی سەرۆك وەزیرانی عیراق گەڕاندنەوەی وەجبەی دووەمی پارە دزراوەكانی عیراقی راگەیاند كە بە “دزی سەدە” ناسرابوو، بڕەكەی زیاترە لە 134 ملیار دینار و رادەستی بانكی رافیدەین كراوەتەوە.
نوسینگەی سەرۆك وەزیران لە بەیاننامەیەكدا بڵاویكردووەتەوە، لە رێگەی بەدواداچوونی سەرۆك وەزیران و بە هاوكاری لەگەڵ ئەنجومەنی باڵای دادوەریی، لایەنە تایبەتەمەندەكانی كەیسەكانی نەزاهە بەردەوامن لە بەدواداچوون و گەڕانەوەی ئەو پارەیەی ئەمانەتی باج كە دزرابوو و ئەویش لە چوارچێوەی ئەوەی پێی دەوترێت “دزی سەدە”.
ئەوەش هاتووە، لەو چوارچێوەیەشدا وەجبەی دووەمی ئەو پارانە كە بڕەكەی 134 ملیار و 455 ملیۆن و 600 هەزار دینار گەڕێنراوەتەوە و خراوەتەوە سەر حسابی لقی سەرەكی بانكی رافیدەین، بەوەش كۆی گشتی پارە گەڕێندراوەكە تاوەكو ئێستا گەیشتووەتە 317 ملیار و 535 ملیۆن و 536 هەزار و 525 دینار.
لە “دزی سەدە”دا لەلایەن چەند بازرگان و كەسایەتییەكەوە بەناوی 5 كۆمپانیاوە ئەنجام درا، بڕی زیاتر لە 3 ترلیۆن و 700 ملیار دینار لە بانكی رافیدەین دزرا، كە پارەی “ئەمانەتی باج” بوو، ئەوەش لە مانگی 9ی ساڵی 2021 تاوەكو مانگی 8ی ئەمساڵ.
