واژۆ
سندوقی نەتەوەیەكگرتووەكان بۆ دانیشتووان لە عیراق ئاشكرای كرد، ستراتیژیێكیان داڕشتووە بۆ ئەوەی تاوەكو ساڵی 2030 رێژەی هەژاری بۆ 50% لە عیراق كەم بكەنەوە، ستراتیژەكەش دوای چەند مانگێكە دەكەوێتە بواری جێبەجێ كردن.
مەهدی عەلاق راوێژكاری سندوقی دانیشتوانی نەتەوەیەكگرتووەكان لە عیراق لە بەیاننامەیەكدا رایگەیاندووە، 17 ئامانجی گەشەپێدانی بەردەوامیان دەستنیشانكردووە كە پەیوەندییان بە چارەسەركردن و نەهێشتنی هەژارییەوە هەیە، لانیكەم تاوەكو ساڵی 2030 رێژەی هەژاری لە عیراق بۆ 50% كەمدەكەنەوە.
رونیشیكردووەتەوە، بۆ ئەو مەبەستەش عیراق ستراتیژێكی هەیە لەلایەن وەزارەتی پلاندانانەوە نوێدەكرێتەوە و دوای چەند مانگێك دەكەوێتە بواری جێبەجێكردن.
بەپێی داتاكان، لە عیراق 9 ملیۆن كەس هەژارن و 4 ملیۆن كەس واتا 14%ی دانیشتووان بێكارن، هۆكارەكانیش بۆ بوونی گەندەڵییەكی زۆر و بەرزبوونەوەی نرخی شمەك و ئەو شەڕ و گرژی و ناكۆكییانەوەیە كە عیراق بەخۆیەوە بینیویەتی.
