سەرۆكی فەرمانگەی هەماهەنگی و بەدواداچون رایگەیاند، بەهۆی جێبەجێكردنی یاسای چاكسازییەوە تەنها لە وەزارەتی شەهیدان و ئەنفالكراوان 13 هەزار موچەی نایاسایی بڕدراون.
عەبدولحەكیم خەسرۆ سەرۆكی فەرمانگەی هەماهەنگی و بەدواداچونی هەرێم رایگەیاندوە: حكومەتی هەرێمی كوردستان كۆتایی بە دۆسیەی ئەو كەسانە هێناوە كە لە موچەیەك زیاتر وەردەگرن و موچەی 4 هەزار كەس لەوانەی دو موچەو سێ موچەیان وەردەگرت بڕدراون، بەو پێیەش 5 ملیار دینار بۆ گەنجینەی حكومەت گەڕاوەتەوە لە بڕینی دو موچەیی و سێ موچەیی كە ساڵانە دەگاتە 60 ملیار دینار.
عەبدولحەكیم خەسرۆ ئاماژەی بۆ ئەوەشكردوە: هەر لە چوارچێوەی جێبەجێكردنی یاسای چاكسازی لە وەزارەتی شەهیدان موچەی زیاتر لە 13 هەزار كەس بڕدراوە، ئەوانە پێشتر بەشێوەیەكی نایاسایی سودمەندبون لەموچەی حكومەت، هەنگاوەكانیش بەردوامدەبن بۆ چاكسازی.
