واژۆ
شارەزایەكی كەشناسی ئاشكرای كرد، زریانی ورچی بەفرین لە 3 میحوەرەوە روو لە عیراق بەتایبەتی هەرێمی كوردستان دەكات و هۆشداری دەداتە هاوڵاتیان لە نزمبوونەوەیەكی زۆری پلەكانی گەرما، بەشێوەیەك دەیان ساڵە بەو شێوەیە نزم نەبووەتەوە.
شاهین هرمزی شارەزای كەشناسی ئاشكرای كردووە، بەپێی پێشبینییەكان زریانێكی بەفربارینی سەخت لە هەرسێ میحوەری “توركیا، ئێران و سوریا”ەوە روو لە عیراق دەكات، كە بە “زریانی ورچی بەفرین” ناودەبرێت، بەم نزیكانە دەستپێدەكات.
ئاماژەی بەوەشداوە، لەو ماوەیەدا پلەكانی گەرما بەشێوەیەك دادەبەزن كە ماوەی چەند دەیەیەكە بەو شێوەیە دانەبەزیوە، شەپۆلەكە لە هەرسێ میحوەرەكەوە لە هەرێمی كوردستان دەدات، هەروەها لە ناوچەكانی خۆرئاوای عیراق وەك تكریت و كەركوك و بەغدا دەدات، بەڵام بەشێوەیەكی كەمتر.
ئەو شارەزا كەشناسییە جەختی لەوەش كردووەتەوە، لەناوچەكانی هەرێمی كوردستان 20 سانتیمەتر بەفر دەبارێت و لە هەندێك ناوچەی تر 10 بۆ 5 سانتیمەتر دەبارێت، پلەكانی گەرما بۆ كەمتر لە “-3” دادەبەزن، بۆیە داوا لە جوتیاران دەكات كە كێڵگەكانیان دابپۆشن، چونكە كاریگەری شەپۆلەكە بۆ سەر كێڵگەكانیان وێرانكەر دەبێت، هەروەها پێویستە نەوت و غاز لە ماڵەكانتان هەڵگرن پێش شەپۆلەكە، داواش لە خاوەن ئاژەڵ و مەڕ و ماڵات دەكات، كە شوێنی گەرم بۆ مەڕ و ماڵاتەكەیان دابین بكەن.
شاهین هرمزی هێمای بۆ ئەوەش كردووە، بەهۆی گرتنی رێگەكان نرخی سوتەمەنی بەرز دەبێتەوە بەتایبەتی لە هەرێمی كوردستان، هەروەها ئەگەری هەیە شەپۆلەكە بگاتە ناوچەكانی باشوری عیراقیش.
