واژۆ
وەزارەتی شارەوانی و گەشتوگوزار بڵاویكردەوە، ساڵی رابردوو لە پارێزگای هەولێر بە بەهای 29 ملیار دینار پرۆژە جێبەجێ كراوە، كە خەرجییەكانیان لەسەر بودجەی 15٪ی داهاتی شارەوانی بووە.
وەزارەتەكە لە راگەیەندراوێكدا باسی لەوە كردووە، لەسەر بودجەی 15٪ی داهاتی سەرۆكایەتی شارەوانی هەولێر 40 پرۆژە و لەسەر بودجەی پەرەپێدانی پارێزگای هەولێر 37 پرۆژە لە سنوری هەر 6 بەڕێوەبەرایەتییەكانی سەر بە سەرۆكایەتی شارەوانی هەولێر جێبەجێ كراون، لەسەر بودجەی 100٪ی شارەوانی و تەمویلی دارایی 3 پرۆژە و لەسەر پێشینەی بەڕێوەبەرایەتییەكانیش 11 پرۆژە جێبەجێ كراون.
ئەوەش هاتووە، پڕۆژەی ستراتیژی شەقامی بازنەیی 150 مەتری هەولێر بە گوژمەی زیاتر لە 131 ملیۆن دۆلار لە شەقامی “هەولێر – كۆیە” بۆ “هەولێر – شەقڵاوە”، هەروەها شەقامی خێرای رێگەی گۆپاڵ بە گوژمەی زیاتر لە 110 ملیۆن دولار جێبەجێ كراون.
هەر بەپێی راگەیەندراوەكە، هەر لە ساڵی رابردودا لە رێگەی كارگەی قیری سەرۆكایەتی شارەوانی هەولێرەوە بڕی 7 هەزار و 132 تۆن قیر بۆ چاككردن و قیرتاوكردنی شەقام و كۆڵانەكانی شاری هەولێر بەكارهاتووە، هەروەها لە رێگەی تیمەكانی ئەندازەی پاركەكانی سەر بە شارەوانی زیاتر لە 121 هەزار دار و 182 هەزار گوڵ چێندراون، ئەمەش كاریگەرییەكی باشی لە زیاتركردنی رێژەی سەوزایی شار هەبووە، ئێستا رێژەكەی گەیشتووەتە 19.5٪.
