واژۆ
بەپێی پێشبینییەكانی كەشناسی، دوانیوەڕۆی ئەمڕۆ چوارشەممە بارانبارین لە تەواوی ناوچەكانی هەرێمی كوردستان دەستپێدەكات و سبەینێش بەردەوام دەبێت، پلەكانی گەرماش بەشێوەیەكی بەرچاو دابەزین بەخۆیانەوە دەبینن.
بەڕێوەبەرایەتی كەشناسی و بومەلەرزەزانی هەرێم بڵاویكردووەتەوە، ئەمڕۆ چوارشەممە ئاسمان نیمچە هەور دەبێت، لەدوای نیوەڕۆ دەگۆڕێت بۆ هەوری تەواو و سەرەتا بارانبارین لەسنوری پارێزگای دهۆك دەستپێدەكات، پاشان لەكاتەكانی ئێوارەدا تەواوی ناوچە جیاجیاكانی هەرێم دەگرێتەوە.
ئەوەش هاتووە، بارانی سنوری پارێزگای دهۆك و هەولێر مام ناوەند دەبێت و هەندێك كات بە لێزمە دەبێت و هەورە تریشقەشی لەگەڵ دا دەبێت، هەروەها پلەكانی گەرما نزیك دەبێتەوە بەراوورد بە تۆمارەكانی دوێنێ و خێرایی با 10 بۆ 20 كیلۆمەتر دەبێت لە كاتژمێرێكدا.
سەبارەت بە كەشوهەوای سبەینێ پێنجشەممە ئاماژە بەوەدراوە، لەكاتەكانی بەیانی زوودا ئاسمان هەوری تەواو دەبێت لەگەڵ بارانبارین لە ناوچە جیا جیاكاندا، لەگەڵ نزمبونەوەی پلەكانی گەرما و ئەگەری تەرزەبارین هەیە، لەگەڵ بارینی بەفر لەناوچە شاخاوییە سنوریەكان، لە دوای نیوەڕۆ و ئێوارەدا بارانبارین كەم دەبێتەوە بەشێوەیەكی گشتی ئاسمان بۆ نیمچە هەور دەگۆرێت، پەلەكانی گەرما 5 بۆ 7 پلە نزمدەبنەوە.
