واژۆ
دادوەری خانەنشین لەتیف مستەفا رایدەگەیەنێت، راپۆرتەكەی وەزارەتی دەرەوەی ئەمریكا بەتەواوەتی دەستی خستۆتە سەر پێشێلكاریەكانی دەسەڵاتدارانی هەرێم بە حیزب و حكومەتەوە.
حاكم شێخ لەتیف راشیگەیاندوە، راپۆرتەكە زۆر وردەو راستی پێكاوە، چونكە خۆیان چەند ساڵە ئەم قەوارەیەیان دروستكردوەو خۆشیان پاراستویانەو چەندین تیمیشیان بە رەسمی و نارەسمی لە هەرێم بونیان هەیە، كەچی بەداخەوە دەسەڵاتدارانی هەرێم لەجیاتی بە دەنگەوەهاتن و هەوڵدان بۆ رێگریكردن لە پێشێلكارییەكان جارێكی ترو وەك پیشەی هەمیشەییان، “سەعید سەحافەكەی” خۆیان راسپاردوە راپۆرتەكە بەدرۆ بخاتەوە.
ئاماژشیكردوە، ئەم راپۆرتە وەك راپۆرتی رێكخراوە نێودەوڵەتیەكانی چاودێری مافی مرۆڤ وەك هیومان رایتس وۆچ و ئەمێنیستی و نەتەوەیەكگرتوەكانیش نیە، ئەم راپۆرتە هی وەزارەتی دەرەوەی ئەمریكایە بەدڵنیاییەوە كاریگەریی و لێكەوتەی سیاسی دەبێت، دەتوانین بڵێین سەرەتای گەڕانن بەدوای بەدیلدا، بەدیلەكەش دەكەوێتە سەر شانی خەڵكی كوردستان.
