واژۆ
وەزارەتی دارایی و ئابوری حكومەتی هەرێمی كوردستان رونكردنەوەیەكی لەسەر 400 ملیار دینارەكەی بەغدا بڵاوكردەوە.
لە راگەیەنراوێكدا وەزارەتی دارایی و ئابوری هەرێم بڵاویكردۆتەوە، لەسەر ئەو چەواشەكاریانەی تایبەت بەپرسی 400 ملیار دینارەكە لە چەند سایت و پەیج و دەزگایەكی راگەیاندن بڵاوبۆتەوە بەپێویستمانزانی ئەم رونكردنەوەیە بۆ رای گشتی بخەینەڕو.
لە رونكردنەوەكەدا راگەیەنراوە، بڕی ئەو 400 ملیار دینارە لەلایەن ئەنجومەنی وەزیرانی عیراقەوە بۆ مانگی تشرینی دووەم و كانونی یەكەمی ساڵی 2022 بڕیاری لەسەر درابو، بەڵام بەچەند هۆكارێك دواخراو لەسەرەتای ئەم مانگە خرایە سەر هەژماری بانكی وەزارەتی دارایی و ئابوری هەرێمی كوردستان، وەزیری دارایی و ئابوری رۆژی 14/3 لە لێدوانێكی رۆژنامەوانیدا رایگەیاندبو 400 ملیار دینارەكە تەنها بۆ موچە هاتوەو بۆ هیچ بابەتێكی تر خەرج ناكرێت و موچەی مانگی ئازاریش بەبێ كێشە دابەش دەكرێت.
هەر لە رونكردنەوەكەدا وەزارەتی دارایی جەختیكردۆتەوە ئەو رێژەیەی مانگانە لەوەزارەتی دارایی و ئابوری هەرێم بۆ سلێمانی خەرج كراوەو خەرج دەكرێت هیچ گۆڕانكاریەكی بەسەردا نەهاتوە، هەروەها بەهۆی دابەزینی داهاتی نەوتەوە كە بۆ موچەی مانگی شوبات تەنها 340 ملیار دینار لە وەزارەتی سامانە سروشتیەكانەوە خراوەتە سەر حسابی وەزارەتی دارایی و ئابوری لەگەڵ 400 ملیار دینارەكەی بەغدا بۆ موچەی مانگی شوبات تەرخانكراوەو ئەو كورتهێنانەشی دروستبوە لە داهاتی ناوخۆ پڕدەكرێتەوە، هەروەك چۆن پێشتر كراوە.
