واژۆ
كونسوڵی گشتی ئەمریكا لە هەرێمی كوردستان راپۆرتێكی ماڵپەڕی “فۆڕن پۆلیسی” شێركردووە كە تێیدا هاتووە، ماڵە كارتۆنییەكەی هەرێمی كوردستان لە لێواری روخاندایە.
عەلی حەمە ساڵح ئەندامی دەستلەكاركێشاوەی پەرلەمانی كوردستان لە تۆڕی كۆمەڵایەتی فەیسبووك نوسیویەتی، بەرپرسانی هەرێم نایانەوێ تێبگەن، كونسوڵی ئەمریكا لە هەولێر ئەم نوسینەی داناوە”ماڵە كارتۆنیەكەی هەرێم لەبەردەم ڕوخاندایە.
ئاماژەی بەوەشداوە، پێگەی فۆرن پۆلیسی لە راپۆرتێكدا سەبارەت بە دۆخی هەرێم دەڵێت، هەرێمی كوردستان لە لێواری روخاندایە و سەركردەكانی تەنها لە خەمی خۆیاندان، كوردستان وەك نیمچە دورگەیەكی دیموكراسی و گەشەسەندنی ئابوری لەخۆرهەڵاتی ناوەڕاست ناودەبرا، بەڵام وادەدردەكەوێت ئەمڕۆ لە تاریكاییەكی قوڵدابێت.
ئەوەش هاتووە، جیاوازی چینایەتی و نەبونی دەرفەتی كاركردن بووەتە هۆی سەرهەڵدانی دروستبونی شەپۆلی كۆچكردن و گەڕان بەدوای ژیانێكی باشتردا، پێگە ئەمریكیەكە داواش دەكات بەرپرسانی ئەمریكا و ئەوروپا لێپرسینەوە لەسەركردەكانی كوردی عیراق بكەن لەسەر گەندەڵی و پێشێلكردنی مافەكانی مرۆڤ، لەبری پشتیوانیكردنیان لەڕووی سەربازی و سیاسیەوە.
لە هەمان راپۆرتدا هاتووە، پارتی و یەكێتی ئازادی رادەبڕینیان لەناوچەكانی ژێر دەسەڵاتیان كۆتوبەندكردووە، لەڕێی هێزەوە رێگری لەسەرهەڵدانی ناڕەزایی دەگرن، ڕۆژنامەنوسان بەشێوەیەكی رێكخراو روبەڕوی دەستگیركردن دەبنەوە، شكستی دیموكراسی و كێشەی ئابوری لەكوردستان هۆكارەكەی ئەو سەركردایەتیە سیاسیەیە كە لە خەمی بەرژوەندی خۆیدان و لەلایەن سەركردەكانی خۆرئاواوە پشتیوانی دەكرێت، كە بە دەگمەن لەسەر پێشێلكاری و خراپی ئیدارەدانیان بەئاشكرا سەرزەنشیان دەكەن.
