واژۆ
لە پارێزگای دێرەزور لە رۆژهەڵاتی سوریا بە موشەك هێرشكرایە سەر كێڵگەی نەوتی عومەرو كێڵگەی غازی كونیكۆو دەوروبەری كە هێزەكانی ئەمریكا تیایدا جێگیر كراون.
بەپێی لێدوانی سەرچاوەیەك بۆ ئاژانسەكان، لەو ناوچانەوە كە گروپە چەكدارەكانی ئێرانیان تیادا جێگیرن هێرشە موشەكیەكە بۆ سەر هەردوو كێڵگەی نەوتی عومەرو غازی كونیكۆ ئەنجامدراون كە هێزەكانی ئەمریكای تێدا جێگیر كراون، هەروەها هێزەكانی ئەمریكاش بە تۆپ و موشەك وەڵامی هێرشەكانیان داوەتەوە، لەماوەی دوو رۆژدا دوەمینجارە بە موشەك هێرشبكرێتە سەر كێڵگەی نەوتی عومەرو دەوروبەری.
لەبارەی هێرشەكانیشەوە پێشتر پاتریك رایدەر وتەبێژی وەزارەتی بەرگری ئەمریكا (پێنتاگۆن) رایگەیاندبو، 10 موشەك نراون بەناوچەیەكی دێرەزورەوە كە هێزەكانی ئەمریكای تیادا جێگیرن.
گروپە چەكدارەكانی سەر بە ئێران لە قەزاكانی ئەلبوكەمال، موحسان و ئەلمەیادین لە رۆژهەڵاتی دێرەزور چالاكن و ئەندامەكانیان بە رەچەڵەك ئێرانی، عیراقی، لوبنانی، ئەفغانستانی و پاكستانین.
