واژۆ
شاندی حكومەتی هەرێمی كوردستان گەیشتە بەغدا و بڕیارە لەگەڵ بەرپرسانی عیراق گفتوگۆ لەسەر هەناردەی نەوتی هەرێمی كوردستان بكەن، كە لە چەند رۆژی رابردودا راگیرا.
بەپێی زانیارییەكان، پێشنیوەڕۆ ئەمڕۆ سێشەممە شاندی حكومەتی هەرێم گەیشتووەتە بەغدا و ئاوات شێخ جەناب وەزیری دارایی سەرۆكایەتی شاندەكە دەكات، هەروەها هەریەكە لە وەزیری سامان سروشتییەكان و سەرۆكی دیوانی ئەنجومەنی وەزیرانی هەرێم ئەندامی شاندەكەن.
سەرچاوە ئاگادارەكان باس لەوەدەكەن، ئامانجی سەردانی شاندەكە بۆ گفتوگۆكرنە لەسەر مەلەفی نەوتی هەرێمی كوردستان كە لە چەند رۆژی رابردودا بەهۆی بڕیارێكی دەستەی ناوبژیوانی سەربە ژوری بازرگانی نێودەوڵەتی لە پاریس لە بەرژەوەندی سكاڵایەكی عیراق هەناردەكردنی راگیرا.
هەر بەیانی ئەمڕۆ جوتیار عادل وتەبێژی حكومەتی هەرێم لە تویتێكدا ئاشكرای كردبوو، بەیانی ئەمڕۆ شاندی حكومەت بۆ درێژەدان بە گفتوگۆكانی تایبەت بە دۆسیەی نەوت لەگەڵ حكومەتی عیراق بەرەو بەغدا بەڕێكەوت.
