واژۆ
عەبدولسەلام بەرواری ئەندامی شاندی دانوستانكاری پارتی جەخت لەوە دەكاتەوە، پێش پشووەكانی نەورۆز لەگەڵ یەكێتی لەسەر هەموو شتێك رێكەوتوون و هیچ بابەتێكی پەیوەندیدار بە هەڵبژاردنەوە نەماوە لەسەری دابنیشن.
بەرواری بە دەنگی ئەمریكای وتووە، پێش پشووەكانی جەژنی نەورۆز لەسەر خاڵە سەرەكییەكانی هەمواری یاسای هەڵبژاردن لەگەڵ یەكێتی رێكەوتوون، یەكێتی دەیەوێت هەڵبژاردنی بەشێوەی 4 بازنەیی بێت وتیان باشە، داوایان كرد كورسییەكانی هەر پارێزگایەك بەپێی ئاماری عیراق بێت وتیان باشە، باسی لیستی تێكەڵ و داخراو كرا هەر وتیان باشە، سەبارەت بە كورسی كۆتاكانیش هاتنە سەر ئەو رایەی بابەتەكە بۆ پێكهاتەكان خۆیان جێبهێڵرێت.
باسی لەوەش كردووە، لە دانیشتنی تیمی تەكنیكی پارتی و یەكێتی لە پڕێكدا یەكێتی چەند ماددەیەكی هێنا، پارتیش وتیان ئەمە ناكرێت، چونكە هەندێك بابەتیان هێنابوو كە دەكرا وەك رێنمایی لەلایەن كۆمسیۆنە دەربچێت هەروەها هەندێك داواكاریش یاسایی نەبوون.
ئەندامەكەی شاندی دانوستانكاری پارتی ئەوەشی ئاشكرا كردووە، ئەگەر ئەم هەفتەیە لەگەڵ یەكێتی دابنیشین و شتی تازە نەهاتە پێشەوە، دەتوانن پرۆژەیەكی هاوبەش یاخود دیدگایەكی نزیك پێشكەش بكەن، ئەوكات كاری لیژنەی یاسایی پەرلەمان ئاسان دەبێت و لە رووی تیۆرییەوە دەكرێت لەم هەفتەیە هەموو شت تەواو ببێت.
