واژۆ
بۆ پاراستن و سەلامەتی گیانی هاوڵاتیان، لەشاری هەولێر سەرجەم لایەنەكان خرانە حاڵەتی ئامادەباشییەوە.
بەگوێرەی راگەیەنراوێك، بەسەرپەرشتی ئومێد خۆشناو پارێزگاری هەولێر كۆبونەوەیەكی تایبەت لەپێناو بەرگرتن لە دروستبونی لافاو و كەمكردنەوەی مەترسی رودان و زیانەكانی ئەنجامدراوە.
لەسەرەتای كۆبونەوەكەدا، پارێزگاری هەولێر دوای بەدواداچون بۆ سەرجەم ئەو هەنگاو و رێكارانەی لەماوەی رابردودا لەلایەن فەرمانگە خزمەتگوزارییەكانەوە بۆ كەمكرنەوەی مەترسیەكانی رودانی لافاو و چارەسەركردنی هۆكارەكانی دروستبونی گیراوەتەبەر، تیشكی خستەسەر بەردەوامیدان بە پڕۆسەی پاككردنەوەی رێرەی ئاوی سروشتی باران و ئاوی قورس و كەندو سەرجەم چاڵەكانی ئاو وەرگرتن و مەنهۆلەكان و خاوێنكردنەوەی ئاوەڕۆكان و هەموو ئەو شوێنانەی كە دەبنە هۆكاری كۆبونەوەی ئاو و مەترسی دروستبونی لافاو لە سنوری پارێزگای هەولێر.
لە تەوەرێكی تری كۆبونەوەكەدا، جەختكراوەتەوە كە لەماوەی (72) كاتژمێری داهاتودا جگە لەوەی ژوری ئۆپراسیۆنی پارێزگای هەولێر لەپێناو دورخستنەوەی مەترسییەكانی لافاو لەئامادەباشی تەواودا دەبێت، هەریەك لە بەڕێوەبەرایەتییەكان وەك یەك تیم بۆ هەر ئەگەر و روداوێكی نەخوازراوی دروستبونی لافاو و پاراستن و سەلامەتی گیانی هاوڵاتیان لە ئامادەباشی تەواودا دەبن.
