واژۆ
ئەمڕۆ 100 ساڵ بەسەر بە پارێزگابوونی هەولێردا تێپەڕ دەبێت و ئومێد خۆشناو پارێزگاری شارەكە لە پەیامێكدا دەڵێت، هەر كورد و كوردستانییەك شانازی بە هەولێرەوە دەكات.
ئومێد خۆشناو لە پەیامێكدا بڵاویكردووەتەوە، بەبۆنەی 100 ساڵەی بە پارێزگابوونی هەولێر شاری خۆشەویستی و ئاشتی، قەڵای بەرز و پڕشكۆی پێكەوە ژیان و یەكترقەبوڵكردنی ئایینی، جوانترین پیرۆزبایی لە دانیشتوانی شارەكەمان بە تایبەتی و سەرجەم كوردستانیان بە گشتی دەكەین، هیواخوازین هەمیشە هەولێری سەربەرز بە گەشاوەیی و جوانی و ئاوەدانی و ئارامی بمێنێتەوە.
نوسیویشیەتی، هەولێری سیمبولی ئاوەدانی و ئارامی و هەڵگری ئاڵای بەیەكەوە ژیان و تەبایی و برایەتی، بە درێژایی مێژووی هەزاران ساڵی سەرتۆپكی بەرگری و پێشەنگی ئازادیخوازی و خۆڕاگری و بەرگری بووە لە مافە رەواكانی گەلەكەمان و سەرقافڵەی قوربانیدان و خەبات بووە بۆ ئازادی و لانكەی شۆڕش و شۆڕشگێڕانی كوردستان.
پارێزگاری هەولێر ئاماژەی بەوەشداوە، هەولێر شوێن و پێگەی زانایانی ئاینی و مەڵبەندی پێگەیاندی كەڵە شاعیران و نوسەران و ئەدیبان و هونەرمەندان بووە، بۆیە هەر كورد و كوردستانییەك لە هەرشوێنكی دونیا بێت شانازی بە هەولێری پایتەختی كوردستان دەكات.
