واژۆ
رێكخراوی تەندروستی جیهانی ئاشكرای كرد، یەكەم كەس بە ڤایرۆسی ئەنفلۆنزای باڵندە جۆری “H3N8” گیانی لەدەستداوە كە ژنێكی چینییە.
رێكخراوەكەی بڵاویكردووەتەوە، ئەنفلۆنزای باڵندەی جۆری “H3N8” لە ساڵی 2002ەوە بڵاوبووەتەوە و تاوەكو ئێستا هیچ كەسێك بەو ڤایرۆسە گیانی لەدەستنەداوە، بەڵام لە رۆژی 16ی مانگی رابردودا ژنێكی چینی تەمەن 56 ساڵا بەو ڤایرۆسە گیانی لەدەستداوە.
رونیشكراوەتەوە، ژنەكە لە هەرێمی “گوانگدۆنگ” ژیاوە و سێیەم كەس بووە كە تووشی ئەو ڤایرۆسە بووە، كە جۆرێكی لاوەكی ئەنفلۆنزای باڵندەیە، پێشتر بەهۆی توشبوونی بە هەوكردنی سییەكانەوە رەوانەی نەخۆشخانە كرابوو.
رێكخراوی تەندروستی جیهانی ئەوەشی بڵاوكردووەتەوە، ئەو ژنە نەخۆشی تری هەبووە و هەروەها پێشتریش چووەتە دەواجین و لە دەوروبەری ماڵەكەیشیدا باڵندەی كێوی هەبوون، تاوەكو ئێستا كەس لە نزیكەكانی تووش نەبوون.
