واژۆ
ئەمریكا تاقیكردنەوە موشەكیە بالیستیە دورمەوداكەی كۆریای باكوری بەتوندی ئیدانە كردو داوایكرد، بەمەبەستی ئەنجامدانی دانوستان دەرفەتی دیپلۆماسی بڕەخسێنرێت.
ئەدریان واتسەن وتەبێژی ئەنجومەنی ئاسایشی نەتەوەیی ئەمریكا لە راگەیەنراوێكدا ئاماژەی بەوە داوە، ئەمریكا بەتوندی تاقیكردنەوە موشەكییە بالیستیە دورمەوداكەی كۆریای باكور سەركۆنە دەكات و جۆ بایدن سەرۆكی ئەمریكاو تیمی ئاسایشی نەتەوەیی لەگەڵ هاوبەش و هاوپەیمانەكاندا لە نزیكەوە لە هەماهەنگیدان.
وتیشی: تاقیكردنەوە موشەكییەكانی كۆریای باكور پێشێلكارییەكی بێڕێزانەیە بەرامبەر بڕیارەكانی ئەنجومەنی ئاسایشی نێودەوڵەتی و ئەم تاقیكردنەوە موشەكیانە گرژییەكان زیاتر دەكەن و مەترسی ئەوەیان هەیە ببنە هۆی ئەوەی ناوچەكە ناسەقامگیریی زیاتر بەخۆیەوە ببینێت، ئەم جۆرە كارانە نیشانیدەدەن كۆریای باكور برەودان بە چەكی وێرانكەری نایاسایی و بەرنامەی موشەكیی بالیستیان لەلا گرنگترە لە دابینكردنی خزمەتگوزارییەكان بۆ گەلی كۆریای باكور.
وتەبێژی ئەنجومەنی ئاسایشی نەتەوەیی ئەمریكا داوایكرد، بەمەبەستی ئەنجامدانی دانوستان دەرفەتی دیپلۆماسی بڕەخسێنرێت و دەرگای دیپلۆماسی ئەمریكاش واڵایە بۆ ئەم مەبەستە پێویستە پیۆنگیانگیش دەستبەجێ واز لەو جۆرە كارانە بهێنێت و بێتە سەر مێزی دانوستان.
