واژۆ
شارەزایەكی كەشناسی بڵاویكردووەتەوە، بەپێی پێشبینییەكان ئەم هەفتەیە پلەكانی گەرما بەرزدەبنەوە، بەڵام دواتر شەپۆلێكی بارانبارین روو لە ناوچەكە دەكاتە و رۆژانی جەژن باراناوی دەبێت و مەترسی دروستبوونی لافاو هەیە.
شاڵاو هیدایەت شارەزای كەشناسی پێشبینییەكانی كەشوهەوای بڵاوكردووەتەوە و تێیدا هاتووە، لە ئەمڕۆ شەممەوە تاوەكو كۆتایی هەفتە هەرێمی كوردستان و ناوچەكە دەكەوێتە ژێر كاریگەری بەرزە پەستانێكی باكورەوە كە لە ئەوروپاوە دێتە و بەو هۆیەوە ئاسمانی ناوچەكان ساماڵ و خۆرەتا و دەبێت.
باسی لەوەش كردووە، تاوەكو كۆتایی هەفتە هیچ شەپۆلێكی باران نییە، گەر هەشبێت هەوری ناوخۆن و هەوری ناوخۆش پێشبینی كردنیان بۆ مەودای كەم بۆ دەكرێت 3 تاوەكو 6 كاتژمێر، بەڵام تاوەكو ئێستا روودانی ئەمەش لاوازە، بۆیە ئەم مەودایە ئەوەی روونە تاوەكو كۆتایی هەفتە كەشێكی سەقامگیر باڵادەستە.
ئەو شارەزا كەشناسیە وتوشیەتی، لە ئەمڕۆ شەممەوە بە پلەی كەم پلەكانی گەرما بەرز دەبێتەوە بەڵام لە یەكشەممەوە تاوەكو كۆتایی هەفتەكە 6 تاوەكو 8 پلەی تر بەرز دەبێتەوە، لەكۆتایی هەفتە و بەولاوە سیستمێكی بەرزە پەستان لەسەر خۆرئاوای ئەوروپا و بەشێكی تری ئەوروپا جێگیر دەبێت ئەمەش رێدەكاتەوە بۆ هاتنی شەپۆلەكانی دابارین بۆ ناوچەكانی هەرێم و دەوروبەر و رۆژی جەژنیش باراناوی دەبێت، جارێكی تر شەپۆلێكی تری بەهێزی باران تەواوی ناوچەكان دەگرێتەوە و مەترسی لافاوی لێدەكرێتەوە.
