واژۆ
هێزی بەرگری شارستانی دوبەی رایگەیاند، بەهۆی ئاگركەوتنەوە لە باڵەخانەیەكی نیشتەجێبون لانیكەم 16 كەس گیانیان لەدەستدا.
میدیا ناوخۆییەكانی دوبەی بڵاویانكردۆتەوە، ئاگر لە نهۆمی چوارەمی باڵەخانەیەكی نیشتەجێبون لە گەڕەكی ئەلراس لە بەشی كۆنی شارەكە كەوتۆتەوەو بەهۆیەوە 16 كەس گیانیان لەدەستداوەو 9ی دیكەش برینداربون، لێكۆڵینەوە سەرەتاییەكانیش دەریانخستوە كە ئاگرەكە بەهۆی پابەندنەبونەوە بوە بە مەرجەكانی سەلامەتییەوە.
باس لەوەشكراوە، لە ساڵی 2017 دا دەسەڵاتدارانی ئەو شارە رێسای توندی بیناسازییان پەسەندكردوەو بۆ كەمكردنەوەی مەترسی ئاگركەوتنەوە، هۆكاری ئەو روداوانە بەشێوەیەكی سەرەكی دەگەڕێتەوە بۆ ئەو مادە سوتێنەرانەی كە لە روپۆشی دەرەوەی بیناكاندا بەكاردەهێنرێن.
دوبەی یەكێكە لە حەوت میرنشینەكەی ئیماراتی یەكگرتوی عەرەبی و ژمارەی دانیشتوانەكەی نزیكەی 3.3 ملیۆن كەسە نزیكەی %90ی ئەو رێژەیەش خەڵكی بیانین.
