واژۆ
بەسەرپەرشتی نێچیرڤان بارزانی سەرۆكی هەرێمی كوردستان كۆبونەوەیەكی فراوان لەنێوان شاندێكی باڵای هێزی هاوپەیمانان بە سەرۆكایەتیی جەنەرال ماپیو مكفارلن فەرماندەی هاوبەشی هێزی هاوپەیمان لە عیراق و سوریاو وەزارەتی پێشمەرگەو دەزگا پەیوەندیدارەكانی دیكەی هەرێمی كوردستان بەڕێوەچو.
بەگوێرەی راگەیەنراوێك، لە كۆبونەوەكەدا گفتوگۆ دەربارەی رێكخستنەوەو چاكسازی لە هێزی پێشمەرگەدا كراو هەڵسەنگاندن بۆ قۆناغەكانی جێبەجێكردنی ئەو پلانە كرا كە لە چوارچێوەی رێككەوتنی نێوان وەزارەتی پێشمەرگەو وەزارەتی بەرگریی ئەمریكادایە، هەروەها باس لەو ئاستەنگ و ئاڵنگارییانە كراوە كە دێنە بەردەم پرۆسەی یەكگرتنەوەكە.
لای خۆیەوە نێچیرڤان بارزانی هاوكارییە بەردەوامەكانی هاوپەیمانانی بۆ پێشمەرگە لە قۆناغ و بوارە جیاوازەكاندا بەرز نرخاندوەو جەختی لە خێراتركردنی هەنگاوەكانی یەكخستنەوەی پێشمەرگەو لابردنی بەربەستەكانی بەردەم پرۆسەكە كردۆتەوە.
هەروەها مكفارلن بەردەوامی پشتگیری و هاوكارییەكانی هاوپەیمانانی بۆ پێشمەرگە لە بوارە جیاوازەكانداو جێبەجێكردنی هەنگاوەكانی رێكخستنەوەی پێشمەرگە لەچوارچێوەی وەزارەتی پێشمەرگەدا بەشێوەیەك هەرێمی كوردستان ببێتە خاوەن هێزێكی نیشتمانی یەكگرتو دوپاتكردۆتەوە.
