واژۆ
بەبۆنەی 125 هەمین ساڵیادی رۆژنامەگەریی كوردی و 25 ساڵەی دامەزراندنی سەندیكای رۆژنامەنوسانی كوردستانەوە، نێچیرڤان بارزانی سەرۆكی هەرێمی كوردستان پەیامێكی بڵاوكردەوەو رایگەیاند: داوا لە رۆژنامەنوسانی كوردستان دەكەم بەوپەڕی ئەمانەت و بەرپرسیاریەتییەوە مامەڵە لەگەڵ وشەدا بكەن.
لەبەشێكی پەیامەكەیدا نێچیرڤان بارزانی رایگەیاندوە، سڵاو بۆ یادو گیانی میقداد میدحەت بەدرخانی پێشەنگ دەنێرین كە یەكەم رۆژنامەی (كوردستان)ی چاپ و بڵاوكردەوەو لەم یادەدا هەمو پشتیوانییەك بۆ رۆژنامەنووسان و ئازادیی رۆژنامەگەری و رادەربڕین و ئازادیی قەڵەم و نوسین دوپات دەكەمەوە، ئازادیی رۆژنامەگەری، بنەماو كۆڵەیەكی سەرەكی هەموو كۆمەڵگەیەكی زیندوی پێشكەوتوە، پێویستییەكی لەپێشی برەودان بە دیموكراسی و ئازادییەكان و پاراستنی مافەكانی مرۆڤە، بۆیە دەبێت پارێزگاری لێ بكرێت.
راشیگەیاندوە، وشە بەرپرسیاریەتییە، بۆیە داوا لە رۆژنامەنوسانی كوردستان دەكەم بەوپەڕی ئەمانەت و بەرپرسیاریەتییەوە مامەڵە لەگەڵ وشەدا بكەن و ئازادو پیشەیی و راستگۆیانە هەواڵ و روداوەكان بگوازنەوە، كار و ئەركی خۆیان بە رێكوپێكی و لەچوارچێوەی ئیتیكی رۆژنامەوانیدا جێبەجێ بكەن بۆ ئەوەی بتوانن رۆڵی دروستی خۆیان لە دەستنیشانكردنی هەڵەو كەموكوڕییەكان و راستكردنەوەیان بگێڕن.
