واژۆ
هێزە ئەمنییەكان باندێكیان دەستگیر كرد، كە كاریان لەسەر فریودانی قوتابیان كردووە و وەزیری پەروەردەش داوا لە قوتابیان دەكات خۆیان لەو باندانە بەدوور بگرن.
ئالان حەمە سەعید وەزیری پەروەردە لە كۆنگرەیەكی رۆژنامەوانیدا وتی، پێویستە قوتابیان تەركیز نەخەنە سەر ئەوەی كە پرسیار دزەی كردووە و ئامێر لە باندەكان بكڕن و پێویستە خۆیان لەو باندانە بەدوور بگرن، دڵنیایان دەكەنەوە كە تاوەكو بەرەبەیانی تاقیكردنەوەكانیش پرسیار نەچووەتە پارێزگاكان.
ئاماژەی بەوەشداوە، دزەپێكردنی پرسیارەكانی تاقیكردنەوەی پۆلە كۆتاكان بەپێی یاسا سزای توندی بۆ دانراوە، بۆ ئەوەی دادپەروەری بسەلمێنن هەموو رێكارێك بەرانبەر باندە فریودەرەكان دەگرنەبەر، پرۆسەكە لەنێو پرۆگرامەكانی خوێندن بە چەند قۆناغێك رێكخراوە بۆ ئەوەی ببێتە كولتورێك و رۆشنبیرییەك بۆ قوتابیان.
هەر بە وتەی وەزیری پەروەردە، مۆبایلی تایبەتیان بۆ هەموو ئەو مامۆستایانە دابین كردووە كە بەشداری لە تاقیكردنەوەكانی پۆلی 12 دەكەن و نابێت ئامێرە ئەلكترۆنییەكان ببەنە ژوورەوە، هەروەها دەبێت پشكنین بۆ قوتابیان بكەن، نابێت تەنانەت دوای تاقیكردنەوەش وێنەی پرسیارەكان بگیرێت، چونكە وەزارەتی پەروەردە دواتر ئەنجامەكان بڵاودەكاتەوە.
